Awit

Mary Edeza De Leon

September 18, 2010

Sumasayaw ang alon

at nagbabanta ang luha

sa gilid ng iyong mga mata

na pilit mong tinitikom,

pinipinid at ikinakahon.

Pigil ang pagalpas

ng bawat ampiyas

ng mabining ambon

habang nakatanghod

sa araw na papalubog.

Hinuhuli ang daluyong

ng damdaming pumapaimbulong

pinaaawit ng sonetong

hindi para sa iyo

- at hindi magiging iyo.

Sabay sa indayog ng alimuom

ang pusong latay ng pasa at galos.

Pinapalaya sa musika ng pait

ang lahat mong lungkot at hinanakit.

Inaawit ang sonetong

hindi para sa iyo,

sonetong kailanma'y di magiging iyo.